[东方报]世界盃：出線生死戰穩陣行先 伊拉克細守要塞[06-26]

十七号

世盃I組尾輪生死戰，塞內加爾硬撼伊拉克。雙方頭兩輪都輸晒，為爭出線今仗冇得保留，不過大家近況都咁曳，唔係話想贏就贏到，伊拉克勝在有自知之明，本身攻力已經不足，仲有前線主將因傷上陣成疑，相信今場都係以防守為優先，寧捧3.5球細盤。（Now 619及617周六凌晨3時直播）

由於法國同挪威已提早鎖定I組頭兩名直接出線席位，因此同為0分嘅塞內加爾及伊拉克，今仗只能力爭贏波攞3分，再睇吓博唔博到以最佳第3名資格晉級。雖然講到非勝不可咁，不過塞內加爾同伊拉克近4場，同樣只得1和3負，前者呢4場狂失9粒，見到都唔開胃，邊隊贏到真係幾難估。

擺鐵桶抗塞內加爾
相比之下，伊拉克雖然亦唔好得幾多，但佢哋明知自己攻力麻麻，惟有專注做好防守，盡量減少失球。翻查紀錄，球隊由上年6月至今，各項賽事近18場有17次開3球或以下，包括上仗對住擁有基利安麥巴比、奧士文尼迪比利等頂級前鋒嘅法國，全場面對19次埋門，最終只輸0比3，算係輸得少，再之前同西班牙拍跳更打成1比1，加上前鋒艾文侯賽因上仗傷出，今仗上陣成疑，攻力弱上加弱，相信呢支亞洲球隊會進一步加強防守，力抗塞內加爾再伺機偷襲，今仗唔慌多波入。