[东方报]友誼賽：南韓之旅第二擊 曼城上力贏畀里睇[08-09]

十七号

今晚熱身賽重頭戲，曼城同馬德里體育會喺中立場南韓交鋒，曼城今夏率先展開亞洲之旅集訓，並已經喺南韓踢咗1場熱身賽，提早適應環境，有助今仗發揮。反觀馬體會患有「恐英症」，近4次對英超球隊，錄得1和3負差劣成績，包括上場熱身賽不敵曼聯，遇上同樣來自曼徹斯特嘅「藍月亮」，恐怕唔樂觀。（周日晚7時開賽）

曼城以亞洲作為季前集訓行程，上周六訪港同國際米蘭交鋒，雖然打和1比1，互射12碼落敗，但其實整體演出更勝一籌，只因缺少射手艾寧夏蘭特，其他進攻球員把握力較弱，浪費大量入波機會，否則應該贏波。「藍月亮」上場對韓職明星隊，攻門質素有明顯提升，上半場已經入3球，最終以3比1勝出。隨住球員愈來愈上力，加上新領隊馬利斯卡嘅戰術逐漸成形，曼城今仗應會有更佳演出。

床單軍患「恐英症」
至於馬體會近期都踢咗兩場熱身賽，首仗以4比1大勝基達菲，但去瑞典集訓對住曼聯，「恐英症」又再次發作，領先之下倒輸1比2。「床單兵團」近4次對英超球隊未嘗1勝，包括上屆歐聯4強對阿仙奴，僅1和1負出局，16強次回合亦輸畀熱刺。

此外，馬體會今次亞洲之旅缺少4位世盃亞軍阿根廷國腳，包括前鋒祖利安艾華利斯、翼鋒基利安奴施蒙尼、泰亞高艾美達、後衞拿侯爾摩連拿，挪威射手阿歷山大索洛夫亦未歸隊，人腳比曼城更加不整，隨時再輸1場。