[东方报]歐國聯：麥總退隊火力減 法國輪換追細好時機[09-28]

august

歐國聯A1組，兩支首輪贏波球隊交鋒，比利時主場迎戰法國，由名帥施丹率領嘅法國上仗小勝土耳其1比0，首席射手兼入波功臣基利安麥巴比不幸受傷退隊，今仗鋒線威力大打折扣，加上為免傷兵問題惡化，可能會避重就輕選擇輪換。睇番法國各項賽事近5場有4次總入球開2球或以下，寧願博2.5球入球細。（周二凌晨2時45分開賽）

法國經歷迪甘斯執教14年之後，今夏聘請施丹接手領軍，呢位54歲前皇家馬德里教練銳意改革，除咗徵召多位生力軍之外，上仗首次帶隊對土耳其，亦將過往迪甘斯慣用嘅4231陣式改為433，球員需要時間適應新戰術，進攻效率難免受影響，最終僅憑基利安麥巴比下半場入波贏1比0。最大鑊係呢位神鋒入波過程中整傷膝部，已經返回皇馬治療，嚴重打亂施丹部署。加上法國緊接仲有兩場歐國聯分別對意大利，以及次循環再鬥比利時，為免又出現傷兵，今仗應會額外謹慎，並輪換陣容，唔會搏得太盡。

比利時遇剋星唔敢谷
另邊廂，由荷蘭少帥雲邦美執教嘅比利時上場歐國聯旗開得勝，作客以2比0擊敗意大利，但表現並非特別出色，全因對手意大利處於低潮，先至佔到甜頭，不宜高估。同埋比利時一向被法國食住，雙方近5次交鋒，比利時輸晒，包括兩年前歐國聯被法國「雙殺」，今仗即使有主場之利，亦未必有優勢，應會採取穩陣踢法，以不敗為目標，屆時或會陷入拉鋸戰，入波唔會多。