[东方报]英超：熱刺搶禮物追第一隊入球[12-28]

十七号

英超快車期另一場好戲，白禮頓主場迎戰熱刺。白禮頓雖然賽程編排有利，但佢哋近況一般，加上三笘薰受傷影響攻力，未必頂得住熱刺強攻，熱刺聯賽3連勝，加上連續12場先入波數據支持，今場再追熱刺第一隊入球。（Now 622周五凌晨3時30分直播）

白禮頓冇三笘薰差一截
聖誕檔期各隊都好忙碌，相對上白禮頓就顯得好悠閒，佢哋對上一場聯賽係上周五凌晨對水晶宮，今場抖夠先對熱刺，而下場聯賽係下周三凌晨對韋斯咸，有足夠時間休息，球員體力上有着數。不過球隊近況回落，近3場聯賽僅得2和1負，上場末段憑韋碧克建功，作客驚險逼和水晶宮1比1，仲有進攻主力三笘薰不幸受傷，要撐拐杖離場，今場缺陣，再睇番佢哋近5場聯賽主場錄得1勝4和，相信今場攞1分亦滿足。

熱刺傷停問題仍然嚴重，應付聖誕快車賽程極之不利，但佢哋主攻踢法係唔會變，隨住中鋒李察利臣回勇，熱刺聯賽3連勝強勢反彈，中場比蘇馬停賽空缺將由盧施素頂上，即將離隊踢亞洲盃嘅隊長孫興民，更將毫無保留為熱刺瞓身搏殺，進攻火力有保證，而且佢哋先入波已成常態，今場不論勝負，熱刺第一隊入球都係最佳選擇。