[东方报]英超：硬碰硬！般茅打鵲吼半和[01-18]

十七号

今晚早場有贏到唔識停嘅紐卡素，主場迎戰般尼茅夫。兩隊今季表現都大獲好評，「喜鵲」目前強勢9連勝，不過般尼茅夫同樣硬淨，連續10場賽事未逢敗仗，當中5場作客3勝2和，包括大勝曼聯以及上場打和車路士，今場可謂兩雄相遇，雙方近6次交手5次開半場和，一於吼實半場和。（Now 621周六晚8時30分直播）

般尼茅夫同紐卡素踢法都好體力化，紐卡素近期非常強勢，各項賽事連贏9場，包括作客擊敗阿仙奴，阿歷山大伊沙克上場對狼隊「起孖」兼助攻，連續8場聯賽入波，打破球隊傳奇前鋒舒利亞紀錄，睇走勢佢仲有排刷新紀錄，入波唔會停，再睇紐卡素9場勝仗僅失3球，攻力強之餘防守一樣有料到。

休息充足頂得住
不過紐卡素能否10連勝，仲要問過般尼茅夫。「般茅」近期同樣異軍突起，各項賽事近10場6勝4和未輸過，而且佢哋周中2比2打和車路士嗰場係早1日踢，比紐卡素多1日時間休息，加上近4次對賽錄得1勝3和不敗，心理上唔怕「喜鵲」，有權做攔路虎，紐卡素要贏佢哋可能要費一番功夫，如果淨計半場，「般茅」頂住唔輸嘅機會更高，半場和值得一試。