[东方报]世盃南美：哥倫比亞半場速擒秘魯[06-06]

十七号

世盃外南美洲區第15輪賽事，排第6的哥倫比亞主場迎戰排第9的秘魯。外圍賽尚餘4輪，南美洲有6.5個席位，哥倫比亞仲要繼續搶分，主場出擊定必主動搶攻，以該隊能力，要贏實力疲弱嘅秘魯唔難，留意到哥倫比亞近4場世盃外主場3次半場領先，捧半場主勝穩陣。（周六凌晨4時30分開賽）

南美洲區積分榜現時除咗阿根廷提早出線，其餘9隊都為晉級名額積極搶分，其中第2至6名之間只相差3分，而第6嘅哥倫比亞就比第7嘅委內瑞拉多5分，換句話講，只要委內瑞拉同少1分排第8嘅玻利維亞最後4輪攞少過5分，都威脅唔到前6名嘅球隊，哥倫比亞出線壓力未如想像中大，預期會有正常發揮。

球星如雲兼佔地利
以實力計，哥倫比亞鋒線擁有路易斯迪亞斯同祖漢杜蘭，攻中有占士洛迪古斯，中後場有水晶宮孖寶丹尼爾蒙路斯、謝法臣拿馬，對住1個歐洲5大聯賽球員都冇嘅秘魯，加上主場之利，應可輕鬆取勝。

秘魯實力較弱，不過距離附加賽5分，尚有一線希望，相信唔會輕易放棄，無奈嘅係佢哋作客成績實在太差，7場世盃外作客僅得1和6負，今場搶分機會渺茫，恐怕未完半場已經失守，半場主勝值博。