[东方报]歐霸：惡客里昂扑錘搶Ｗ[04-07]

august

韋斯咸踢歐霸飄忽難靠
今晚歐霸盃8強首回合重頭戲，英超「錘仔幫」韋斯咸主場硬撼法甲里昂。喺法甲失準嘅里昂踢歐霸可謂判若兩隊，今屆一場波都未輸過，氣勢如虹；相反韋斯咸喺今季歐霸盃表現略嫌飄忽，客勝好分頭值得捧場。

米查利安東尼奧陷入球荒
韋斯咸喺16強次回合要鬥到加時，先憑耶莫蘭高嘅入波淘汰西維爾，不過佢哋近3場歐霸賽事輸咗兩場，包括曾於主場不敵薩格勒布戴拿模，表現唔算得可靠。「錘仔幫」前鋒米查利安東尼奧已經足足成個月冇波入，正陷入信心危機，加上阿根廷中場蘭仙奴今場要停賽，攻力成疑，另外正選後衞賓莊臣或繼續因傷缺陣，對近7場賽事6仗有失波嘅韋斯咸嚟講，絕對係一大打擊。

法甲球隊里昂16強兩回合計以2比1擊敗葡超勁旅波圖，佢哋今屆喺歐霸盃發揮出色，8戰錄得6勝2和不敗佳績，夾埋狂轟18球，絕對有力反客為主。雖然喺歐霸貢獻6球嘅首席射手托高伊甘比，今場上陣成疑，但另一射手迪比利最近狀態唔錯，近4場轟入4球，16強次回合仲幫球隊先開紀錄，呢位法國前鋒將會肩負入波重任。

翻查數據，里昂近6場歐霸盃作客全勝，今場造訪英格蘭贏埋唔奇，客Ｗ好分頭有可取之道。