[东方日报]歐冠：首名之戰皇馬明恰國米[12-07]

august

今晚歐聯有D組榜首大戰，由「1哥」皇家馬德里主場硬撼「2哥」國際米蘭。雙方已經提早出線，今仗純屬名次之爭，但「銀河艦隊」近年喺歐聯食住國米，皇馬小讓平半，上盤值捧。
（Now 645周三凌晨4時直播）

先講D組形勢，由於「3哥」舒列夫不再神奇，近3輪輸晒，已經落後國米4分，肯定無緣晉級16強，而國米則落後榜首皇馬2分，仍有機會爭首名。經過前幾屆歐聯分組賽都臨尾香出局後，「藍黑軍團」喺新帥施蒙尼恩沙基帶領下，終於擺脫心魔成功出線，心態上難免有所放鬆，而且迪維積、高拉洛夫、達美安及蘭奴捷亞均因傷倦勤，防線存隱憂，就算想贏亦有心無力。

另一邊廂，皇馬各項賽事豪取8連勝，若再數遠啲，近11仗取得10勝1和，氣勢如虹，儘管箭頭賓施馬上仗聯賽贏皇蘇之役早段傷出，幸好入替佢嘅盧卡祖域交出入波兼助攻，連呢位雪到硬晒嘅塞爾維亞前鋒都咁搶韁，弗爆巴西孖寶雲尼斯奧斯祖利亞同洛迪高高斯更加唔使多講，成班波依家信心爆棚，真係擋都擋唔住。

近3次碰頭「艦隊」全勝
翻查紀錄，雙方連續兩屆於歐聯分組賽同組，未計今仗，之前3次碰頭，皇馬全部贏晒，其中2仗保持不失，包括今屆首循環造訪聖西路球場，全場被圍攻之下，靠洛迪高高斯完場前神來之筆，最終贏1比0響頭炮，擺明格食格，值得一提係呢3次交手，洛迪高高斯都入咗2粒，明顯係國米剋星，上盤捧得過。