[东方报]英超：約基利斯鋒力可靠 阿仙奴明恰賓福特[02-12]

十七号

英超周中快車壓軸之戰，輪到榜首阿仙奴登場作客賓福特。「兵工廠」上月不敵曼聯後，表現迅速反彈，各項賽事4連勝，為免被第2位曼城拉近積分距離，一定全力爭勝。以阿仙奴近8場作客獲得7勝1和嘅強勁走勢，有力再下一城，簡單捧客勝。（Now 621及611周五凌晨4時直播）

未計周四凌晨賽事，阿仙奴暫時領先第2位曼城6分，雙方將於4月次循環交鋒，意味「藍月亮」仍有機會縮短積分差距，所以「兵工廠」主帥阿迪達絕對唔可以掉以輕心。幸好阿仙奴水準穩定，作客都有出色發揮，各項賽事近8場作客取得7勝1和，包括英聯盃擊敗車路士，歐聯贏意甲榜首國際米蘭，遇上實力平庸嘅賓福特，勝算更加高。

「蜜蜂軍團」遇強冇運行
阿仙奴箭頭約基利斯踏入2026年後，表現大翻身，近8次上陣射入6球，上仗對新特蘭後備上陣踢30分鐘就梅開二度，效率非常高，今仗有望擔任正選，好大機會攻陷賓福特大門。

至於「奇兵」賓福特早前曾爆冷擊敗前列球隊阿士東維拉，但每逢遇上傳統勁旅，往往都會陷入劣勢，包括上月0比2不敵車路士。雖然首席射手伊戈泰亞高今季聯賽有17球進帳，但大部分入波都係喺上年12月之前射入，近12次英超上陣有9次食白果，腳風唔多順。加上「蜜蜂軍團」另一位進攻主將奇雲舒哈迪停賽，令球隊雪上加霜。此外，雙方近6次對賽，阿仙奴取得5勝1和，明顯食住賓福特，今場有望再次全取3分而回。