[东方报]英超：球員為前途唔敢hea 狼隊回勇頂賓福特[03-16]

十七号

今輪英超壓軸之戰，賓福特主場對狼隊，包尾嘅狼隊護級成功機會渺茫，但放開懷抱比賽，反而有超水準發揮，近5場聯賽取得2勝2和1負，包括擊敗利物浦，愈踢愈有信心。反觀賓福特屬於「神經刀」，表現信唔過，當中近5次主場出擊只有1勝，讓唔起對手，狼隊讓球客勝（+1）值博。（Now 621周二凌晨4時直播）

雖然賓福特位居前列，但水準非常飄忽，近8場比賽之中，既可以贏前4位分子阿士東維拉，打和榜首阿仙奴，但卻主場吞白禮頓兩蛋，上場英足盃更加被護級球隊韋斯咸淘汰，今仗遇上狼隊，未必佔到甜頭。

首循環嘜死泰亞高
此外，賓福特太依賴前鋒伊戈泰亞高入波，今季有超過4成聯賽入球來自呢位巴西球員，一旦佢遭對手凍結，賓福特攻力必定大減。賓福特上年12月聯賽首循環作客狼隊，伊戈泰亞高踢足全場都食白果，可見狼隊防守呢位射手，有一定心得。

狼隊已經被護級線以上球隊拋離雙位分數，好大機會下季降落英冠，但並冇影響球員士氣，反而愈踢愈上力，取得英超2連勝，對手仲係阿士東維拉及利物浦，加上打和阿仙奴2比2，近5場聯賽僅1敗，表現非常硬淨。事實上，狼隊球員必須把握今季餘下時間盡力展現實力，一旦狼隊降班，都可以吸引其他球會招攬，為個人前途仍然要搏盡。前鋒洛迪高高美斯近3次上陣入2球，腳風非常順，令狼隊擁有不俗反擊力，可望全身而退。