[东方报]英超：爭標關鍵全力互片 曼城搶宮大陣仗[05-13]

十七号

今晚英超補賽兼爭標關鍵戰，「2哥」曼城於主場火併水晶宮。曼城近期惡戰連場，好彩前線嘅艾寧夏蘭特、謝利美杜古腳風極順，勢必以攻代守；水晶宮將目標放晒喺月尾嘅歐協聯決賽，聯賽已成例行公事，冇心理包袱下隨時同「藍月亮」駁火，捧3.5球嘅入球大最上算。（Now 621及611周四凌晨3時直播）

曼城依家聯賽同英足盃雙線作戰，自今個月5日開始，12日內要惡鬥4場，頭2仗先逼和愛華頓3比3及大勝賓福特3比0，雖然嚟緊周末有英足盃決賽對車路士後顧，但為咗追趕榜首阿仙奴，今仗對水晶宮不容有失。

水晶宮寓賽於操放開踢
幸好「藍月亮」重拾強大火力，除咗射手艾寧夏蘭特腳風順番之外，左翼謝利美杜古近2仗入3粒，仲要全部都係「世界波」，再配合侵略性極強嘅卓基，攻力有保證。

另邊廂，水晶宮於聯賽已經上岸，依家成副心機放喺月尾嘅歐協聯決賽對華歷簡奴，力爭球隊史上首個歐洲賽冠軍，因此餘下聯賽可寓賽於操，雖然佢哋今仗未必想做攔路虎，但冇壓力下比賽，志在提升狀態及信心，尤其係伊斯美拿沙亞、佐真拿臣、桑馬迪達等攻擊手，近期輪流發威，不容忽視。翻查紀錄，雙方近5次聯賽交手，合共炮製24個入波，其中4次開4球或以上，隨時再演入球騷。