[东方日报]欧冠：阿特蘭大豁出去等睇入球騷[12-08]

august

歐聯F組最後一輪生死戰，阿特蘭大主場遇上維拉利爾。排第3位嘅阿特蘭大目前落後第2位維拉利爾1分，今場要贏波先取得16強席位，肯定豁出去搶攻。事實上呢支意甲「神奇球隊」向來擅攻不擅守，目前形勢正好發揮最大強項，加上佢哋近5次歐聯對西甲球隊，有4次總入球達4球或以上，包括首循環同維拉利爾激和2比2，首選中位數2.5球嘅入球大。

維拉利爾作客照搶
由於曼聯已穩奪F組首名出線資格，包尾嘅年青人就篤定出局，餘下一個出線席位成為阿特蘭大同維拉利爾之爭。阿特蘭大教頭加斯柏連尼崇尚進攻足球，主攻踢法贏盡口碑，不過呢種開放式踢法嘅缺點亦非常明顯，就係唔夠穩定，即使取得領先優勢，都難以保住勝果。阿特蘭大今屆歐聯5場分組賽全部先開紀錄，但僅獲1勝，作客曼聯一役，更加係領先2球下倒輸2比3。上輪作客年青人兩度領先下，最後僅逼和3比3，痛失2分，搞到出線形勢陷入被動，事到如今佢哋都唔會改變踢法。

維拉利爾今場打和就可以出線，正所謂久守必失，估計「黃色潛艇」唔會咁蠢一味死守，都想爭取入番粒「保險球」，增加出線機會。事實上佢哋今屆歐聯兩場作客都能夠先開紀錄，踢法唔算消極，今仗或會先下手為強，同阿特蘭大駁火。