[东方报]世界盃：渣古出動強攻伊朗 比利時大舉出擊[06-21]

十七号

世盃G組忽然成為「死亡之組」，經過首輪賽事，4隊同得1分，原本被睇高一線嘅比利時，現時心急如焚，今仗勢必強攻伊朗，力爭打開勝利之門。伊朗有「任務」在身，每場都會搏盡，無懼同比利時駁火，睇番伊朗近5場有4次總入球開3球或以上，首選中位數2.5球嘅入球大。（Now 618及616周一凌晨3時直播）

比利時上場僅逼和埃及1比1，好大程度上因為領隊魯迪加西亞排錯陣，用中場基迪拿尼扮演「假9」踢「無鋒陣」，影響入波能力。下半場換入正宗射手、外號「渣古」嘅盧卡古，效果立竿見影，佢上陣僅22秒就逼到對手擺烏龍，協助比利時扳平。魯迪加西亞吸取教訓之後，相信今仗唔敢再玩嘢，畀盧卡古打番正選，呢位33歲老將因傷缺陣今季大部分賽事，但傷愈後已逐漸恢復狀態，6月初熱身賽對克羅地亞射入1球，加上奇雲迪布尼、謝利美杜古、李安度杜沙特等鋒線猛將，今仗比利時肯定會大軍壓境。

美伊戰事激起鬥志
至於伊朗上仗兩度落後下逼和新西蘭2比2，展現頑強鬥志，由於「美伊戰事」關係，伊朗今次去美國參賽，肩負「特別任務」，就係要喺「敵人」國土揚威，無論輸贏，最起碼要踢出悅目足球，先贏口碑。呢支西亞球隊上場進攻表現獲得認同，除攻入2球外，前鋒泰尼米有1次勁射中柱，中堅阿里尼馬迪曾經頭槌頂入，因越位食詐胡。不過，伊朗防線始終比較薄弱，估計難以抵擋比利時入波，捧2.5球嘅入球大最划算。