[东方报]世界盃：有分落袋就出線 太極虎伺機突襲南非[06-24]

十七号

世盃A組最後1輪，南非火併南韓！由於南非只有1分在手，今仗必須贏波先至有望出線，焗住搶攻之下，防線難免暴露更多空間。相比之下，南韓打和都可以晉級32強，今場專注打突擊更有利發揮，加上南韓近4場比賽取得3勝1負，客勝值博。（Viu TV 99、Now 618、616及馬會指定場外投注處周四早上9時直播）

A組榜首主辦國墨西哥已經提早取得小組首名出線資格，第2位南韓有3分在手，加上對賽成績贏過捷克，所以今場只要攞到1分就能夠以次名晉級淘汰賽，預料領隊洪明甫會以靜制動，為南韓制訂防反戰術，啱晒一向行軍速度快嘅南韓球員胃口，尤其是前鋒孫興民個人突破能力特別強，由佢領銜打突擊，相信南非疲弱嘅防線好難招架得住。

事實上，南韓今屆有不俗發揮，李康仁、吳賢揆、曹圭成等中前場球員踢法極且侵略性，上仗硬撼有主場之利嘅墨西哥，只因門將金承奎同隊友李基赫出現誤會，先至被對手射入全場唯一入球，否則「太極虎」未必會輸，遇上同組實力最弱嘅南非，相信南韓要攞到入波機會甚高。

非洲代表攻守欠佳
至於南非繼首場0比2不敵墨西哥之後，上場對捷克亦處於劣勢，開賽僅6分鐘就落後，要踢到比賽末段靠獲得12碼，先至勉強逼和1比1，表現明顯未夠班。由於南非目前同捷克一樣2戰僅得1分，南非淨得球「-2球」更加排榜尾，如果今場贏唔到，就要執包袱歸家，別無選擇之下，今場惟有豁出去搶攻爭勝。問題係南非攻不銳、守不穩，即使採取主攻，亦未必佔到優勢，更何況佢哋防線脆弱，連續2場都係開波9分鐘內失守落後，南韓可以睇住嚟食，贏面更加大，一於捧客勝。