[东方报]西甲：摩佬回歸群星踢好波 皇馬半W冇甩拖[08-26]

august

皇家馬德里周中主場出擊，迎戰皇家蘇斯達。今場亦係功勳主帥摩連奴「二進宮」後首次喺巴拿貝球場領軍，為求主場立威肯定將士用命，力圖由頭贏到尾，何況「銀河艦隊」近5次對皇家蘇斯達，有4次半場領先，以佢哋強大攻力，上半場破門領先問題不大，半場主勝穩開。（Now 632周四凌晨3時直播）

皇馬經歷上季四大皆空後，今季邀請「摩Dad」回巢執教，決心重振聲威。球隊今夏積極增兵，多位新兵如貝拿度施華、杜費斯同伊巴希馬干拿迪等已在聯賽首輪作客愛斯賓奴亮相，呢場波祖迪比寧咸接應艾達古拿助攻開紀錄，雖然一度被追和，但尾段由新加盟嘅卡路士艾斯比攻入絕殺球，有驚無險贏2比1。

皇蘇後防單薄頂唔住
經過聯賽首仗，相信幾位踢完世盃嘅主力，例如基利安麥巴比同雲尼斯奧斯已回復狀態，今仗回師主場更搶韁，特別係見到宿敵巴塞隆拿首輪大炒艾爾切5蛋，今仗更唔衰得，加上摩帥聲望同凝聚力，球員肯定搏甩髀求大勝，捧半場主勝好快收錢。

皇家蘇斯達屬西甲中游球隊，今季大致保留原有班底，沙治奧高美斯、奧耶沙巴爾等核心主力質素甚高，不過全屬進攻球員，後防略嫌單薄，聯賽首仗作客就以0比1不敵貝迪斯，之前熱身賽亦輸畀科隆同車路士，今場對住「艦隊」嘅豪華鋒線，相信更加難以招架，隨時半場都守唔住。