[东方报]英超：般尼逃生大有作維[05-19]

august

深陷降班危機嘅般尼，今晚尾場作客阿士東維拉，般尼為保英超席位，要同列斯聯及愛華頓爭最後護級資格，嚟緊兩場必定毫無保留拚盡。維拉近況亦唔曳，加上雙方近5次交鋒，4次開3球或以上，今場「棗紅色打吡」揀2.5球入球大啱數。

般尼周日作客熱刺輸0比1，目前排尾3身處降班區，護級形勢相當嚴峻，佢哋同愛華頓都踢少列斯聯一場，相對搶分機會較高，最後兩仗包括今晚鬥維拉，同煞科日對紐卡素，絕對不容有失，心態上肯定都會豁出去放手一搏。其實般尼早前曾經接連擊敗屈福特、狼隊同修咸頓，取得聯賽3連勝，已經證明球員鬥心十足，最緊要係有入波本錢。

維拉主場謝幕唔會放軟手腳
阿士東維拉現時排14位，數字上現時仍有機會殺上前10名，謝拉特首季帶波算係不過不失，球員亦感染咗呢名鐵血領隊嘅鬥志，喺佢帶領下每每拚勁十足，上周中鬥利物浦都能夠先開紀錄，上輪聯賽以1比1賽和水晶宮，連續4場有入波，今仗主場謝幕，肯定唔會喺班球迷面前放軟手腳，實行同般尼上演入球騷。