[东方报]英超：曼城大爆發勢炒森林[08-31]

august

英超強弱懸殊之戰，曼城主場對諾定咸森林。衞冕嘅曼城今季簽入挪威射手艾寧夏蘭特，實力如虎添翼，加上「藍月亮」對弱隊絕不手軟，早前大炒另一支新升班球隊般尼茅夫4蛋，預料會再次大開殺戒。不過「藍月亮」防線唔多穩陣，翻查曼城跨季近5場聯賽主場總入球皆達4球或以上，最好再追中位數3.5球嘅入球大。

夏蘭特弗到冇朋友
曼城自艾寧夏蘭特加盟後，火力進一步提升，呢位挪威國腳身材高大，速度亦非常快，令曼城進攻更立體。「藍月亮」上仗對水晶宮，即使落後兩球，都可以反勝4比2，艾寧夏蘭特頭頂腳踢轟入3球，其中一球更係力壓對方兩位後衞射入，實在非常「屈機」，等閒之輩難以阻擋佢入波。

不過，曼城主攻嘅同時，防線不時出現甩漏；早前作客紐卡素，竟然失咗3球，上仗對水晶宮所失兩球，亦暴露球隊不擅於防守死球。加上兩位中堅尼敦阿基、拿樸迪有傷在身，領隊哥迪奧拿短期內難以重整防線，未必可以保持清白之身。

至於諾定咸森林相隔23年後再戰英超，仍然需要時間適應，現時成績亦未如理想，踢4場聯賽僅1勝1和2負，上仗主場吞熱刺雙蛋，今仗作客曼城，隨時大敗收場。