[东方报]意甲：阿特蘭大掃雷夠氣細[09-11]

august

今晚意甲超早場，阿特蘭大主場迎戰克雷莫納，一向有前冇後嘅阿特蘭大今季改踢穩陣波，效果非常好，5場聯賽取得4勝1和，有4場總入球係2球或以下。既然搵到食相信阿特蘭大會照辦煮碗，只求贏波不求大勝，一於博中位數3.5球嘅入球細。

阿特蘭大上季僅排第8位，失去歐洲賽席位，教練加斯柏連尼下定決心改善防守，效果非常顯著，開季5場聯賽僅失兩球。不過佢哋防守力提升嘅同時，難免影響進攻，上仗對住新升班球隊蒙沙，要踢到下半場先入到波贏2比0，預料今場都係小勝格局。

克雷莫納遇強必死守
克雷莫納開季4連敗後，上仗打和薩斯索羅0比0，總算及時「止血」。事實上球隊相隔26年重返意甲，仲係交緊學費，主守博1分實際啲，作客遇上大勇嘅阿特蘭大，克雷莫納更加唔敢輕舉妄動，捧入球細最划算。