[东方报]英超：維拉保守半和有修穫[09-16]

十七号

今晚英超中下游對決，阿士東維拉主場迎戰「聖人」修咸頓。維拉開咧戰績欠佳，自知防守不穩，近期比賽初段踢得特別保守；「聖人」作客出擊亦唔敢冒進，半場和有追捧價值。

修咸頓作客唔敢冒進
維拉今夏不斷買人，可惜表現不似預期，連同盃賽在內，開季頭7仗只得2勝2和3負，單計聯賽贏得1場咁大把，最大鑊係呢7仗場場有失波，包括英聯盃對保頓先失波下反勝4比1。查實主帥謝拉特有苦自己知，新加盟嘅中堅迪亞高卡路士重傷要抖到下年，焗用今季被「搣柴」嘅前隊長泰朗明斯，難怪防線表現甩甩漏漏，加上右閘馬迪卡殊都傷埋，要用老將艾舒利楊格頂住先，為搶分惟有穩陣行先，初段唔介意同對手鬥磨，上仗打和勁旅曼城1比1，有辦你睇。

修咸頓今季曾反勝車路士2比1，排名亦較維拉高，但實際上只係多對手3分。睇番佢哋近3仗聯賽作客，只得1勝2負，唯一勝仗係擊敗沉到冇朋友嘅李斯特城，不足為據，今晚作客維拉唔慌踢得咁進取。翻查紀錄，維拉近5仗有4次上半場同對手打和，預料初段會先求唔輸，易邊後再睇準機會反擊，半場和有計。