[东方报]歐國聯：丹麥贏即晉級作客克敵[09-22]

august

今晚歐國聯A1組上演榜首大戰，小組榜首丹麥作客第2位嘅「格仔兵團」克羅地亞。克羅地亞仍然倚重莫迪歷等一眾老將，經驗雖豐富但活力欠奉，丹麥喺歐國聯愈戰愈勇，今仗贏波即可出線淘汰賽，戰意更盛，平手盤坐和望贏。

克羅地亞老將多唔慌搏
克羅地亞雖然係上屆世盃亞軍，但現時仍要靠老將莫迪歷、比列錫及洛夫雲等支撐大局，青黃不接問題嚴重。而較當打嘅中場高華錫，傷愈冇耐狀態麻麻，加上臨近世盃，一班老將有乜依郁都幾大鑊，喺歐國聯呢類無關痛癢賽事無謂太搏，何況「格仔兵團」今屆4仗歐國聯僅入3球，攻力疲弱信唔過。

上年歐國盃殺入4強嘅丹麥，自從基斯甸艾歷臣重返球場後，創造力大增，呢位中場指揮官今季加盟曼聯後，表現漸入佳境，除此之外，防線亦有安達斯基斯坦臣鎮守，今次更重召啱啱好番嘅隊長卡積亞，有助提升士氣。查實丹麥各項賽事近5仗4勝1負，包括今屆4仗歐國聯獲3勝，今仗只要贏波，即可鎖定首名殺入淘汰賽，戰意唔使懷疑，絕對有力反客為主。