[东方报]意甲：4連勝銳不可當A米主場攻陷羅馬[01-08]

august

意甲重頭戲，AC米蘭主場迎戰羅馬，上季盟主AC米蘭要追趕榜首拿玻里，每場賽事都不容有失，法國前鋒基奧特已回歸，拍住「新C朗」拉菲爾利亞奧攻堅，火力有保證，A米聯賽主場4連勝，每場攻入至少2球，銳不可當。由摩連奴執教嘅羅馬守強攻弱，而且久守必失，翻查往績，雙方近5次對賽，AC米蘭取得4勝1和，主W值博。

AC米蘭搶分爭榜首
「一哥」拿玻里上仗輸波之後，AC米蘭追至只有5分距離，反超前機會大增，肯定可以刺激「紅黑兵團」士氣。事實上，A米水準發揮穩定，近4場聯賽取得3勝1和，如果單計主場更加係4連勝，包括擊敗宿敵祖雲達斯。兩位射手基奧特、拉菲爾利亞奧今季都有出色表現，前者於今屆世盃為法國射入4球。至於葡萄牙國腳拉菲爾利亞奧今季意甲已有7球進帳及4次助攻，加上上仗入1球及1次助攻嘅「新派路」辛度東拿利，A米今仗入波本錢十足。

另邊廂，羅馬近4場聯賽僅1勝，就係上仗靠博到嘅12碼，以1比0擊敗博洛尼亞，表現欠缺說服力。上季演出大勇嘅前鋒譚美阿巴謙今季狀態嚴重下滑，各項賽事上陣21場僅入4球，保羅戴巴拿傷愈之後，仍然未操起狀態，進攻乏力之下，今仗勢必捱打，AC米蘭贏面比較大。