[东方报]意甲：克雷莫納受讓有作維[01-09]

august

今晚意甲頭場上演「護級6分波」，包尾嘅維羅納主場硬撼尾2嘅克雷莫納。雖然克雷莫納係聯賽唯一未開齋嘅球隊，但作客表現特別硬淨，加上近日有球隊名宿維埃里離世，「帛金波」戰意更盛，遇態沉嘅維羅納，作客亦有力搶分而回，讓球客勝咪錯過。

克雷莫納今季踢咗16仗聯賽仍未開齋，係唯一未贏過波嘅球隊，但仍比包尾嘅維羅納多1分，同佢哋表現硬淨有關。未計今輪，克雷莫納有7場打和，係意甲其中一支和波最多球隊，單計近5仗作客，就錄得4和1負，可見客場唔易輸波。雖然克雷莫納復賽後首仗喺主場不敵祖雲達斯0比1，但全場逼搶打法令對手冇乜計，去到補時失守認真唔抵。

悼名宿戰意更盛
前意大利國腳維埃里上周因胰臟癌離世，呢位曾效力森多利亞、祖雲達斯、車路士等球隊嘅球星，查實喺克雷莫納出身，1980至1984年113次披甲攻入25球，帶領克軍升上意乙，之後再轉投森多利亞。日前全隊都有為佢默哀，而該隊所在地倫巴底嘅克里莫納市亦舉行哀悼活動，市長甚至提出將克雷莫納主場祖雲尼辛尼球場，改名做維埃里球場。因此今仗無論係為護級搶分，抑或想用勝利送別「光頭佬」，克雷莫納戰意必堅。

另一邊廂，維羅納復賽後首仗作客被拖連奴逼和1比1，近11仗聯賽只得1和10負劣績，差到冇朋友，單計主場亦錄得5連敗，未見反彈迹象。連同熱身賽在內，兩軍近5次碰頭，法定時間各得1勝3和1負，不相伯仲，克雷莫納今場有得受讓咁筍，讓球客勝捧得過。