[东方报]意盃：聯賽惡戰後未回氣 A米兵疲又捱細界[01-11]

august

今晚意大利盃16強，AC米蘭主場迎戰拖連奴，AC米蘭剛於聯賽惡鬥完勁旅羅馬，體力消耗非常大，今仗出戰盃賽，好大機會輪換陣容，未必搏盡。另邊廂拖連奴實力差一截，預料會踢穩守突擊，加上雙方交手甚旺細盤，最好揀中位數2.5球嘅入球細。

AC米蘭上仗意甲領先2球之下，竟然喺比賽末段連失2球，被羅馬逼和2比2，吸取教訓之後，今仗肯定會打醒十二分精神，避免重蹈覆轍，預料一旦A米先開紀錄，好大機會放慢比賽節奏，採取拉布戰術，既可以節省體力，亦令對手難以收復失地。

拖連奴實力不足焗守
拖連奴基於實力有限，往往只能以穩守突擊戰術同對手周旋，導致經常出現悶戰，近4場聯賽總入球都係2球或以下，近3場更加全部打和1比1。今場意大利盃一戰定生死，拖連奴更加唔會冒進，隨時「泊大巴」死守，盡量避免先失波，大不了最後以互射12碼分勝負。翻查兩隊近7次對賽，有5次總入球開2球或以下，其中兩年前又係意盃嘅場合，雙方喺16強激戰120分鐘仍然踢成0比0，最終AC米蘭靠互射12碼勝出，今場隨時歷史重演。