[东方报]意盃：發力爭盃賽費倫大盤有信森[01-12]

august

周五凌晨意大利盃16強賽事，費倫天拿主場迎戰森多利亞。主隊近兩季演出不斷進步，今季會向盃賽冠軍目標進發，相反森多利亞依家喺意甲水深火熱，全力護級唔會得閒兼顧意盃。「紫百合」主場火力十足，入球大2.5球值得捧場。

費倫天拿目前喺意甲聯賽排名中游，爭標機會極之渺茫，同時亦冇護級壓力，因此盃賽成為球隊今季重要目標。屈指一算，費倫天拿曾經6次捧走意盃冠軍，上季亦殺入4強階段，今季集中火力爭意盃同歐協聯兩項盃賽冠軍，鬥志十足。事實上，「紫百合」陣容鼎盛，喺卡塔爾世盃光芒四射嘅中場球員蘇夫恩岩拉伯特，今場會復任正選；阿根廷前鋒尼高拉斯干沙利斯養傷兩個幾月，上場復出後備上陣即攻入致勝球，令球隊火力大增。費倫天拿主場向來崇尚進攻，對上7仗主場有6仗總入球開3球或以上，今仗相信唔會改變進取踢法。

森多利亞專心護級
森多利亞踢咗17輪聯賽只係贏過兩仗，依家排喺意甲尾二，護級係球隊首要任務，今場盃賽相信無力兼顧，預計會作出大輪換，而且森多利亞有加利亞雷拉、普錫圖等一大堆傷兵，今仗好可能會殘陣出戰。睇番費倫天拿同森多利亞近8次對賽成績，當中有7場總入球達3球或以上，今仗梗係要再追中位數2.5球嘅入球大。