[东方报]英超：盃賽失威維拉大騷氹球迷[01-13]

august

今晚英超搶分戰，阿士東維拉主場鬥列斯聯。維拉剛喺英足盃倒灶出局，專心番聯賽未必係壞事；列斯聯自11月初後已經兩個月未贏過，難免心急搶分，佢哋近7仗聯賽6次開3球或以上，2.5球入球大高唱入雲。

維拉由新帥艾美利領軍後表現回穩，近兩仗聯賽1勝1和，今輪主場對住同級對手列斯聯，唔會放過搶分機會。佢哋上仗英足盃臨尾連失兩粒，畀英乙球隊史提芬納治踢出局，令球迷大失所望，不過球隊目標都係打好聯賽，盃賽失利影響唔大，今仗會爭取入波氹番球迷。

列斯聯後防不穩夠娛樂性
列斯聯對上一場贏波，要數到11月初4比3反勝般尼茅夫，之後表現麻麻，主要係後防不穩，試過領先下3比4輸畀熱刺，近10仗只有悶和紐卡素一仗保持清白身，近兩仗先後2比2打和韋斯咸同卡迪夫城，踢法夠晒娛樂性。射手班福特可望傷愈復出，有更大本錢搶攻，遇上防線同樣一般嘅維拉，上演入球騷機會甚高。