[东方报]英超：車路士全力搶Ｗ唔放水[01-15]

august

倫敦打吡戰，由力保歐洲賽資格嘅車路士，喺史丹福橋球場迎戰水晶宮。藍戰士雖然成績下滑，兼傷兵滿營，但過去11次鬥水晶宮贏晒，正好趁住對「私房菜」借勢反彈，簡單要個主W。

車路士近8場只得1勝1和6負，戰績確係幾難睇，但因為球隊受嚴重傷兵困擾，據英國傳媒報道，老闆保利仍然非常信任領隊樸達。反而呢個美國商人對部分貴價球員表現不滿，例如9,000萬鎊嘅夏維斯、5,800萬鎊嘅基斯甸普列錫同3,800鎊嘅薛耶治，如果嚟緊半季佢哋表現仲係停滯不前，喺傷兵潮過後，就會審視會唔會將佢哋賣走。

水晶宮接連不敵倫敦球會
藍戰士落後「爭標集團」多個身位，為力保歐洲賽資格，主場袋3分係基本。好彩球隊過去4季都係「倫敦之王」，喺打吡戰中成績最好，尤其對住水晶宮更係格食格，近11次交手均錄得全勝。

水晶宮季中曾經出現小陽春，可惜世盃後打回原形，聖誕新年快車3戰1勝2負，兩場敗仗分別喺主場不敵富咸及熱刺，正正就係倫敦球會，今場作客車路士更加冇運行。以車仔狀態好大機會小勝1粒，鍾意博吓賠率嘅朋友，不妨小試3.3倍讓球和。