[东方报]英超：富咸托弗受讓拆紐[01-15]

august

英超紐卡素主場迎戰富咸，「新土豪」紐卡素近期狀態走下坡，除咗連續兩場聯賽失分之外，仲喺英足盃畀甲組仔錫周三淘汰出局，表現令人失望。反觀富咸愈戰愈勇，近5場正式賽事全勝，加上射手阿歷山大米祖域坐完「波監」，今仗可復出倒戈，有力搶分而回，富咸受讓抵玩，可博讓球客勝。

紐卡素祖連頓醉駕惹官非
紐卡素今季戰績彪炳，已佔據英超前4，但近兩場聯賽都打和0比0，銳氣盡消，雖然作客和阿仙奴並唔失禮，但主場對護級分子列斯聯都贏唔到，就講唔通，可見「喜鵲」始終欠缺傳統班霸嘅穩定性。另外，中場主力祖連頓日前涉嫌醉酒駕駛，被警方落案控告，領隊艾迪侯域今仗可能「雪藏」呢位巴西球星，令球隊實力打折扣。

另邊廂，富咸由上月聖誕「拆禮物日」開始，連贏5場，包括4場英超及1場英足盃，上仗最犀利以2比1擊敗車路士，34歲老將韋利安倒戈射入1球，表現令人驚喜。值得一提，富咸上仗缺少停賽嘅首席射手阿歷山大米祖域，都可以贏車路士，更何況佢今仗復出，絕對令富咸如虎添翼。