[东方报]西杯：皇蘇氣勢勁打卡開上盤[01-17]

august

今晚西盃16強頭場上演西甲內訌，皇家蘇斯達主場火併馬略卡。皇蘇氣勢如虹，各項正式賽事豪取7連勝，加上近年食住馬略卡，有力贏波進身8強，上盤讓半一好路值捧。

講到西甲最弗球隊，皇蘇可謂當仁不讓。連同世盃前在內，佢哋喺各項正式賽事近7仗全部贏晒，除咗中場大衞施華寶刀未老之外，「日本美斯」久保建英愈踢愈好，佢喺日前聯賽巴斯克打吡贏畢爾包3比1之役，入波兼博到12碼，而射手阿歷山大索洛夫喺呢7仗入咗7粒，腳風超順，皇蘇依家已殺上聯賽第3位，梗係想乘勢於盃賽發圍喇。

馬略卡攻力疲弱
馬略卡今季表現尚算平穩，但佢哋最大問題係入波能力麻麻，近5仗正式賽事，法定時間連加時只係入到4粒，其中上圈西盃對住弱旅邦特韋德拉，法定時間更互交白卷，要加時先贏2比0晉級，贏得冇乜說服力，加上近3仗作客輸足兩場，不宜高估。翻查紀錄，雙方近6次正面交鋒，皇蘇贏晒之餘，仲全部保持清白之身，擺明格食格，今仗遇「私房菜」必趁熱起筷，上盤有得諗。