[东方报]西甲：銀河兵疲回唔切氣 皇蘇勢勇受讓抵玩[01-29]

十七号

今晚西甲尾場上演前列大戰，2哥皇家馬德里主場硬撼第3嘅皇家蘇斯達。皇馬上周中西盃踢到加時先晉級，耗力甚多；皇蘇聯賽5連勝絕對唔赦「銀河艦隊」，受讓必捧讓球客勝。

皇馬近期狀態麻麻，喺西超盃決賽輸畀死敵巴塞，雖然之後兩連勝叫做反彈，但上周中西盃8強面對馬體會，幾經辛苦喺法定時間追成1比1，去到加時憑雲尼斯奧斯祖利亞入波兼助攻，先至贏3比1晉級，耗力不小。由於中場悍將曹亞文尼仲養緊傷，主帥安察洛堤又唔鍾意輪換，兩老莫迪歷同卻奧斯冇得休息，令「銀河艦隊」中場活力不足，好難持續控制戰局，加上佢哋賽程頻密，嚟緊又要出戰世冠盃，眾將真係回唔切氣。

阿歷山大索洛夫場場有波入
另一邊廂，皇蘇於上周中西盃8強以0比1不敵巴塞出局，但表現唔曳雖敗不辱。查實皇蘇依家踢多一場下，只落後皇馬3分，比起要多線作戰嘅皇馬同巴塞，皇蘇可專心打聯賽，分分鐘有機會爭標。睇番佢哋近5仗聯賽全勝只失兩粒，箭頭阿歷山大索洛夫場場有波入，順到冇朋友，就算老將大衞施華有傷在身，仲有「日本美斯」久保建英撐住，今仗有得受讓堅筍，讓球客勝咪錯過。