[东方报]英超：榜首爭奪戰分途出擊[03-04]

august

今晚英超有兩場關鍵大戰，阿仙奴同曼城榜首之爭戰況激烈，頭場由「2哥」曼城主場迎戰紐卡素，「喜鵲」防守硬淨夠頂曼城。另邊廂，「1哥」阿仙奴主場迎戰般尼茅夫，「兵工廠」近期賽事頻密，今仗大機會輪換出戰，般茅要搶分護級，面對強隊必死守。

阿仙奴般茅半場講和
英超進入爭冠關鍵時刻，「1哥」阿仙奴主場迎戰般尼茅夫。「兵工廠」唔夠72小時內迎接第2場大戰，加上下周中歐霸盃戰火重燃，密集賽程下將受到嚴峻考驗，一直沿用嘅緊迫同搶攻踢法未必奏效，而且近期賽事亦有留前鬥後迹象，疲兵出戰博半場和好路。

輪換出擊留前鬥後
阿仙奴沿用嘅「勝利11人」近期受傷患及體能困擾，副選同新加盟球員都要臨危受命，但喺戰術運作同進攻流暢性都打折扣，面對死守球隊顯得老鼠拉龜，近7場聯賽有5仗上半場打和，下半場發力先至踢番出最佳水準。

另邊廂，般尼茅夫上仗1比4慘敗喺曼城腳下，依家已跌落聯賽榜尾2，今仗作客必定死守求搶1分，般茅近4場聯賽就有3仗半場打和，面對阿仙奴疲兵出擊，上半場有力阻擋「兵工廠」來襲，開半場和機會高。

曼城鋒力銳減細盤啱素
今晚英超早場，「2哥」曼城主場迎戰紐卡素，曼城王牌艾寧夏蘭特近期入球量「減產」，連帶球隊成績都受影響，而「喜鵲」要搶分爭前4，佢哋近7仗聯賽全開2球或以下，2.5球入球細有計。

曼城現時落後阿仙奴5分，鋒力不足成為主因。夏蘭特今季聯賽雖然累積27球，但踏入2023年明顯有放緩迹象，9仗聯賽入6球睇落好似唔錯，但其中3球係對狼隊一場取得，即是其餘8仗只入3球，當中有5仗食白果。

紐卡素爭前4先求穩
另邊廂，紐卡素失落英聯盃，士氣大受打擊，聯賽打少兩仗下落後「4哥」熱刺4分，係時候收拾心情爭前4，「喜鵲」防守夠穩陣，今季聯賽僅失15球，係英超失波最少球隊，單計近7仗聯賽全開2球或以下，今仗造訪「藍月亮」必先求穩陣，入球細好路。