[东方报]歐霸：阿仙奴士砵亭半場講和[03-16]

十七号

另一場歐霸16強次回合焦點戰，阿仙奴番主場再鬥士砵亭。首回合雙方激和2比2，該場士砵亭戰至損兵折將，今仗作客唔敢冒進，阿仙奴踢親歐霸都例牌慢熱，面對防守行先嘅士砵亭，初段隨時老鼠拉龜冇碇埋手，半場和好路。（Now 643周五凌晨4時直播）

輪換陣容難破鐵桶
葡超勁旅士砵亭首回合一度反先下，卻因中場守田英正誤擺烏龍，被阿仙奴逼和2比2，非常唔抵，最慘係呢位日本國腳，同隊長兼中堅高亞迪斯，因累積黃牌夠數，今仗要坐波監，失去呢兩大主力，對中後場防守影響甚大。幸好現時歐洲賽冇作客入球優惠，因此和波即係由頭嚟過，既然兩大主力停賽，今仗造訪酋長球場隨時擺鐵桶陣。

英超1哥阿仙奴雖然力爭聯賽，但主帥阿迪達亦表明唔會放棄歐霸，不過佢哋每逢出戰歐霸，初段入局慢，近4仗歐霸有3次半場打和。雖然兵工廠近期順風順水，但查實各項賽事近14仗，都有9仗半場握手言和，加上唔排除佢哋會作出部分輪換，對住刻意死守嘅士砵亭，就算贏波晉級都會好吃力，半場和有計，進取啲不妨捧埋半全場「和主」。

格列沙加將續約至2025
大戰前夕阿仙奴亦開始續約事宜，兵工廠主帥阿迪達非常器重中場格列沙加，希望提早同呢位30歲瑞士國腳續約至2025年；由於格列沙加將於明夏約滿，會方有權優先同佢續約1年，並準備啟動呢項續約條款，據悉阿迪達向格列沙加派定心丸，就算兵工廠今夏收購韋斯咸中場迪格蘭賴斯，都唔會動搖佢嘅正選位置，預料雙方好快會達成續約協議。