[东方报]英冠：洛達咸搏盡大起米堡[05-01]

十七号

今晚英冠頭場，洛達咸主場硬撼米杜士堡。洛達咸仍要為護級搶分，米堡已確定前6嘅升班附加賽資格，今仗隨時留力，加上入得又失得，寧捧2.5球嘅大盤。（周一晚8時開賽）

為護級搶分焗攻
洛達咸狀態欠佳，近5仗聯賽只得2和3負未贏過，未計周日賽果，洛軍依家排緊第20位，打少1仗下只領先尾3嘅雷丁2分，仍未擺脫降班危機，需要搶分護級。洛達咸踢咗44輪攻入60球，係下游中入球較多球隊，前鋒奧比歷上仗對卡迪夫城一度扳平，打破近2個月嘅聯賽入球荒，可惜佢哋後防不穩，近5仗只得1場冇失波，為搶分隨時要焗攻。

另一邊廂，「4哥」米堡打少1仗下，領先第7位新特蘭8分，已篤定確保前6名嘅升班附加賽資格，但由於般尼同錫菲聯已取得前2嘅直接升班席位，餘下2輪變成例行公事，主帥兼曼聯名宿卡域克必定計過度過，寧願留力準備附加賽好過，今仗都抱住寓賽於操嘅心態應戰，最重要唔好損兵折將。雖然上仗輸畀盧頓1比2之役，米堡收起射手艾卡邦，但另一前鋒艾查亞有進帳，連續3仗有波入，不容忽視，何況佢哋近7仗全開3球或以上，捧入球大最上算。