[东方报]西甲：貝迪斯求穩細盤包掂[05-04]

十七号

今晚西甲繼續開快車，畢爾包主場硬撼貝迪斯。畢爾包近期頻頻失分，為爭下屆歐洲賽資格，必定小心翼翼；貝迪斯有守將艾加干沙利斯停賽，更加會先做好防守，而且雙方近年碰頭旺少交收，捧2.5球細盤最划算。（Now 632周五凌晨4時直播）

畢爾包防線頂得兩嘴
未計周四凌晨賽果，貝迪斯喺聯賽排緊第6位，只領先畢爾包2分，實力半斤八両。原本走勢唔錯嘅畢爾包，近兩仗聯賽接連失分，包括上仗只能打和馬略卡1比1，現時跌出歐戰區，為爭下屆歐洲賽席位不容再失。「巴斯克雄獅」一向重視防守，今季踢咗32仗聯賽只失32粒，防守能力僅次於巴塞同馬體會，加上近6仗主場僅1勝，今仗唔敢再大意。

另一邊廂，貝迪斯狀態低迷，各項賽事近6仗贏得1場咁大把，其中作客更加3連敗，包括上輪慘吞巴塞4蛋；嗰場先有中堅雷斯菲臘比初段傷出，而入替佢嘅艾加干沙利斯於上半場極速「2黃1紅」被逐，打少個之下即時令防線崩潰，導致大敗而回。艾加干沙利斯今仗要坐波監，雷斯菲臘比應該未能趕及披甲，防線人腳不整，預計作客一定會踢得保守啲。翻查對賽紀錄，兩軍近5次交手，有4次開2球或以下，今仗唔慌多波入，細盤有計。