[东方报]西甲：搶歐聯入場券搏到盡 皇蘇弗爆有利可圖[05-23]

十七号

西甲周中開快車，要爭分確保前4資格嘅皇家蘇斯達，主場鬥艾美利亞。皇蘇啱啱擊敗巴塞隆拿，近4場聯賽獲3勝1和，士氣正盛再贏唔難。艾美利亞作客唔掂，近2場又大敗，皇家蘇斯達讓1/1.5，照捧上盤。（Now 632周三凌晨1時30分直播）

現時排第4嘅皇家蘇斯達，領先第5位嘅維拉利爾5分，聯賽淨番3輪，歐聯入場券仲未穩陣，主場出擊當然要袋晒3分。佢哋季尾狀態大勇，先後擊敗皇馬同巴塞，近4場聯賽獲3勝1和，士氣正盛。

艾美利亞作客曳
另邊廂，艾美利亞現時排14，啱啱喺主場擊敗馬略卡，令到球隊護級形勢稍稍鬆一口氣，今場唔使急於夾硬搶分。事實上艾美利亞作客表現不濟，近8場作客輸6場，最近兩場分別輸畀皇馬2比4同奧沙辛拿1比3，今場相信都頂唔住皇蘇，皇蘇上盤穩陣。

華拉度列頂唔住巴塞
至於上輪輸畀皇蘇嘅巴塞隆拿，今輪快車會作客華拉度列，巴塞於上周已獲頒發西甲冠軍獎盃，球迷唔多唔少會擔心佢哋鬥心。問題係依家排尾4嘅華拉度列實在太弱，聯賽5連敗，今仗之後聯賽最後兩場，會對護級直接對手艾美利亞同基達菲，球隊實力及板櫈深度有限，倒不如留力最後兩仗拚搏，加上佢哋近7次對巴塞全敗，今仗宜捧客勝。（Now 632周三凌晨4時直播）