[东方报]女世盃：全歐組合爭后冠 三獅英雌唔赦鬥牛妹[08-20]

august

女子世界盃決賽上演「全歐組合」，西班牙女足大戰英格蘭女足，兩軍實力旗鼓相當，但論近年大賽成績，以至今屆發揮水平，「三獅女」較為佔優，由分組賽至4強，6場法定時間獲得5勝1和。反觀，「鬥牛妹」踢法有前冇後，防線不穩存在隱憂，英格蘭女足受讓平半，下盤值博。（Viu TV 96台周日晚6時直播）

西班牙女足過去兩屆女子世界盃分別於分組賽、16強出局，今屆第3度參賽，成功進身決賽，表現令人眼前一亮，呢班「鬥牛妹」崛起好大程度上受惠於兩支西甲豪門巴塞隆拿及皇馬近年大力發展女足，帶動國家隊實力大增。

西班牙主強守弱能力見底
西班牙女足亦繼承該國男足主攻踢法，今屆6場法定時間合共轟入16球，但崇尚進攻嘅同時，後防難免比較空虛，曾於分組賽以0比4大敗於日本女足腳下，踏入淘汰賽3場都有失波，其中8強戰至加時先至擊敗荷蘭，上仗4強亦要踢到89分鐘攻入奠勝球，以2比1險勝瑞典，能力開始見底。

另邊廂，英格蘭女足延續奪得上年女子歐國盃冠軍強勢，於今屆女子世界盃分組賽3戰3勝，進入淘汰賽後，除咗16強靠互射12碼淘汰尼日利亞，踢得比較艱辛之外，近兩仗擊敗哥倫比亞、澳洲，都冇受到太大挑戰，兩位前鋒阿歷西亞蘿素、蘿倫漢普連續兩場入波，腳風非常順，以西班牙嘅脆弱防線，恐怕難以抵擋得住呢兩位「三獅英雌」。

英格蘭有「半個」主場
值得一提，今場決賽喺澳洲悉尼舉行，澳洲係英聯邦國家，英格蘭女足猶如佔有半個主場之利，成為球隊另一個爭勝優勢。