[东方报]英超：曼聯回順炒得起錫菲聯[10-21]

august

英超曼聯周日凌晨又登場，將會作客錫菲聯。「紅魔鬼」上場喺瀕臨輸波邊緣絕地反勝賓福特，贏番場後條氣順番晒，經過國際賽檔期調整可望有更佳演出。錫菲聯4連敗近況奇差，近3場都輸兩球或以上，曼聯作客讓1/1.5球照捧上盤。（Now 621及611周日凌晨3時直播）

曼聯早前連番受挫，聯賽輸畀水晶宮，歐聯對加拉塔沙雷又輸，門將奧拿拿踢到慌失失，領隊坦哈格備受批評，出現極大危機，但佢哋死好命，上仗憑後備麥湯米尼補時連入兩球，其中哈利馬古尼交出助攻絕殺，主場以2比1反勝賓福特，避過主場3連敗厄運，靠兩位棄將救番成隊波，「紅魔鬼」必有後福，今場鬥「魚腩」錫菲聯，相信贏波冇難度。

包尾「黑貓」仲未開齋
錫菲聯升班後戰績低迷，聯賽8戰僅得1和7負，仍未打開勝利之門，只得1分排榜末，形勢惡劣。「黑貓」剛經歷聯賽4連敗，近3場都輸兩球或以上，最誇張係上次主場出擊，竟狂吞紐卡素8蛋，後防潰不成軍，今仗隨時再輸鑊甘。