[东方报]英超：狼隊鬥熱刺搶分入球騷[11-11]

august

星期六英超有好戲上演，狼隊主場迎戰啱啱被破不敗身嘅熱刺。熱刺今季喺澳洲領隊普斯迪高路帶領下，表現脫胎換骨，堅定不移嘅進攻理念更大獲好評，今仗後防殘陣下作戰，好大機會出現大手交易，捧2.5球入球大最穩陣。（Now 621及611周六晚8時30分直播）

熱刺今季貫徹高位逼搶踢法，上場喺9人應戰下被車路士打破今季不敗身，但踢少兩個下仍然冇放棄進攻，雖然最終大敗1比4，但呢種「打死罷就」嘅進攻決心就獲得支持。

3將傷停防線穿窿
熱刺今仗防線穿大窿，一對正選中堅基斯甸羅美路要停賽、而雲迪尹就受咗傷，加上左閘烏杜治坐埋波監，以攻代守係球隊唯一方法。

主場出擊嘅狼隊同樣係進攻型踢法，近6場比賽有5場總入球開3球或以上，今仗肯定會盡力搶攻，趁熱刺後防殘陣搵着數。狼隊嘅南韓前鋒黃喜燦今季相當搶鏡，連續6場聯賽主場都有波入，今場同南韓國家隊隊友孫興民大鬥法肯定精彩，入球陸續有嚟！