[东方报]英超：阿仙奴傷疲盡起贏到特[11-25]

august

周日凌晨英超「倫敦打吡」，賓福特主場迎戰阿仙奴，作客嘅「兵工廠」克服小低潮，國際賽前已經全面回勇，加上多名進攻主力傷愈復出，今場可以秤高一線，客勝放心捧。（Now 621及611周日凌晨1時30分直播）

阿仙奴喺國際賽前2連勝，依家只落後榜首曼城1分，喺歐聯亦穩坐榜首，球員信心十足。國際賽期間，中場馬田奧迪加特同前鋒加比爾捷西斯都已傷愈，今場可以候命，「兵工廠」火力大大提升。

阿仙奴今季加入迪格蘭賴斯同夏維斯後，高度同硬淨度大大提升，面對體力化嘅賓福特都唔會輸蝕。阿仙奴季初喺英聯盃曾作客1比0淘汰賓福特，近年對賽亦食住對手，近4次交鋒有3勝1和佳績。

賓福特兩閘打柴有漏洞
賓福特上仗慘吞利物浦3蛋，後防面對快速鋒線出現唔少錯漏，尤其兩閘域高亨利同艾朗希基受傷，隨時成為致命漏洞，今仗對住火力強勁嘅阿仙奴危危乎，客勝值得捧場。