[东方报]西甲：各自為戰咪睇得咁高 皇馬半和追多鋪[09-01]

august

今晚西甲尾場，皇家馬德里主場硬撼貝迪斯。皇馬有「麥總」基利安麥巴比領軍，表面上火力好猛，可惜好睇唔好食，球員各自為戰唔多夾；貝迪斯近4場不敗勁硬淨，加上近年碰頭旺開半場和，不妨追多鋪。（Now 632周一凌晨3時30分直播）

皇馬上季勇奪聯賽及歐聯冠軍，今夏只得卻奧斯掛靴而去，同時獲基利安麥巴比及安迪歷加盟，表面上實力有增無減，但實際發揮就唔多暢順。首先麥巴比習慣踢左路，與另一王牌雲尼斯奧斯祖利亞撞晒位，主帥安察洛堤焗住將「麥總」擺入中路，但近幾場所見佢不自覺又會去番左路，令左路塞晒車。

安察洛堤為咗遷就「麥總」同「小雲」，放棄多年嘅433陣式，而踢4231陣式，前線用過洛迪高高斯、安迪歷、巴謙戴亞斯及艾達古拿等，依然未能擦出火花，加上冇咗卻奧斯「大師級」嘅直線妙傳，祖迪比寧咸又因傷缺陣，進攻變得老鼠拉龜。佢哋頭3場聯賽僅1勝2和，當中大炒華拉度列3粒之役，都係下半場先打破僵局，暫時咪睇得「銀河艦隊」咁高。

貝迪斯硬淨往績唔輸蝕
另邊廂，貝迪斯喺聯賽同歐協聯合共踢咗4場波，取得2勝2和，表現相當硬淨，由於中場核心艾斯高養傷當中，主帥比歷連尼惟有採用較保守戰術。查實貝迪斯近年對皇馬都唔多輸蝕，近7次交手，皇馬贏得兩場咁大把，而且全部開半場和，咁好路梗係再追喇。