[东方报]意甲：帕爾馬蒙沙護級大鬥法[12-28]

august

今輪護級大戰，帕爾馬主場對蒙沙。帕爾馬防線穿窿，門將「日本奧拿拿」鈴木彩艷表現唔掂，17場聯賽只有1場保持不失，蒙沙聖誕前炒咗教練尼斯達，今場有「新帥效應」點都有啲起色，加上帕爾馬近6場，全開3球或以上，推介2.5球入球大。（HOY TV 76台周六晚10時直播）

帕爾馬近況一般，近6場錄得2勝4負，全開3球或以上，輸親波都輸到大大鑊，對上3場包括作客淨吞羅馬5蛋，主場輸畀維羅納2比3，以及作客不敵國際米蘭1比3，後防失球愈輸愈多，門將鈴木彩艷有如紙紮，一射就穿，恐怕短期內無法改善。

喺防守唔掂之下，帕爾馬想攞分，不如選擇同對手鬥攻，佢哋近10場僅得2場冇士哥，尤其今場主場出擊，對住弱旅蒙沙，相信帕爾馬會採取主動。

新帥效應肯定搏命
蒙沙現於意甲成績墊底，至今17戰僅得1勝，近9場聯賽僅得2和7負，球隊喺聖誕前主場1比2輸畀祖雲達斯之後，炒咗前意大利國家隊名將尼斯達，換上年紀更細、執教經驗更淺嘅保捷迪。保捷迪曾經係意大利奧運隊成員，之前只做過維羅納助教，不過新官上任三把火，今場遇上近績同樣差勁嘅帕爾馬，肯定把握搶分機會，預計雙方將會鬥攻，2.5球入球大值捧。