[东方报]意甲：吸取教訓不容再失 地頭龍國米搶半W[02-10]

august

今晚意甲冤家路窄，「2哥」國際米蘭主場惡鬥費倫天拿，亦係兩軍5日內第二度交鋒。國米日前補賽慘敗而回，為爭標不容有失，加上主場出擊例搶韁，半場主勝有計。（周二凌晨3時45分開賽）

日前場波原本喺上年12月頭舉行，當時踢到第17分鐘，費倫中場艾杜亞度保維因為癲癇發作，導致出現心臟驟停，令賽事腰斬，延至上周中補賽，但勢估唔到費倫喺主場爆冷大勝3比0，令人大跌眼鏡，賽後國米主帥施蒙尼恩沙基將輸波責任攬晒上身，仲話會深入分析問題。連同「米蘭打吡」和波在內，國米已經連續2場聯賽失分，未計今輪，喺場數一樣情況下，仲落後緊榜首拿玻里3分，為保衞冕機會實在不容再失。

費倫作客例腳軟
費倫經歷早前連場失分後，近3場聯賽全勝，總算重上正軌，不過「紫百合」一向客場腳仔軟，佢哋各項賽事近5場作客，贏得1場咁大把，國米吸取日前發波瘟教訓後，一定唔會重蹈覆轍。何況「藍黑兵團」主場比賽例搶攻，各項賽事近7次喺自己地頭出擊，有5次上半場取得領先優勢，今仗勢必先發制人，半場主勝捧得過。