[东方报]歐國聯：C朗孭飛葡軍半和壯聲威

歐國聯A4組激戰，葡萄牙主場鬥威爾斯；葡軍雖然有新帥佐治捷西斯上任，但繼續徵召41歲嘅C朗，「換湯唔換藥」情況下，相信C朗繼續正選，預計進攻模式唔會有太大變化，可以用番近績做參考，葡軍近7仗有6次開半場和，繼續追冇錯。（周五凌晨2時45分開賽）

舊年佐治捷西斯出任艾納斯主帥，當時已經話係由C朗欽點，估唔到佐治捷西斯完咗約，就即刻頂替馬天尼斯離任嘅葡軍主帥一職。姑勿論C朗有冇從中作梗，由於兩人喺艾納斯合作愉快，一齊贏得沙特職冠軍，所以佐治捷西斯嚟緊搵番C朗踢正選，可以話係意料之內。

除咗C朗之外，葡萄牙其餘大軍名單都係熟口熟面，大部分有份出戰世盃，所以可以預計戰術唔會有大變化；從博彩角度絕對係好消息，往績參考價值極高，葡軍近7場有6次開半場和，非常慢熱。

威爾斯保守頂住先
威爾斯於世盃外圍賽附加賽準決賽出局，雖然領隊比拿美喺球員時代有豐富英超經驗，但「紅龍」始終技術型球員唔多，佢哋踢法都係偏於舊英式，加上球隊受嚴重傷兵困擾，預料初段會繼續保守作風，英國傳媒預測佢哋會踢「541」陣式，而且威爾斯近4仗亦有3次開半場和，葡軍初段未必咬得入，半場和不妨再追。