阿迪達即場鬧爆杜文　被指「欺善怕惡」

阿仙奴喺英聯盃16強互射12碼不敵英乙球隊費列活特，繼2012/13年球季輸畀巴拉福特之後，隊史第2次英聯盃被第4聯賽級別球隊淘汰。中場麥斯杜文踢對手報復，領紅牌出場，離場時疑似遭主帥阿迪達訓斥，但兵工廠名宿麥臣指呢位西班牙少帥太苛刻，唔應該咁樣對待1位16歲小將。

麥斯杜文85分鐘遭對手哈里遜尼爾飛剷，憤然出腳踢對方報復，換來紅牌出場，導致兵工廠踢少1人，成為出局罪人。杜文準備步入更衣室，阿迪達黑晒面對住佢講咗幾句，明顯不滿呢位小將太魯莽。不過，兵工廠名宿麥臣認為阿迪達「欺善怕惡」：「如果係約基利斯等資深球員被逐，阿迪達唔會咁做，但卻咁樣對1位16歲小朋友，如果我做領隊，我會攬住杜文。」

賽後阿迪達被傳媒問到對麥斯杜文講咗乜，佢冇正面回應，只係話講咗賽前討論過嘅事情，會再了解事件。此外，阿迪達表示，球員態度同表現符合要求，出局唔可以怪責球員，球隊創造大量機會，但往往把握唔到，實在無奈。