[东方报]歐冠：卡Sir保烏紗火併羅馬 曼聯擺大個頭

歐聯焦點之戰，曼聯主場硬撼羅馬，「紅魔鬼」曼聯各項賽事連續9場不勝，主帥卡域克下台壓力愈來愈大，今仗背水一戰，惟有豁出去搶攻博翻身。羅馬火力強勁，應會趁對手處於頹勢，反客為主力爭贏波而回。參考曼聯近5次歐洲賽對意甲球隊，總入球全開4球或以上，一於再追3.5球嘅入球大。（Now 638周三凌晨4時直播）

曼聯對上1次贏波，已經係9月中旬歐聯以4比0大勝沙巴FC，其後一沉不起，近9仗只有3和6負，包括上輪歐聯作客以1比4大敗於另一支意甲球隊科木腳下，今屆歐聯3戰只有1勝2負，為保出線希望，不容再失。

「紅魔鬼」上場英超作吞車路士兩蛋，其實表現並唔差，尤其係上半場創造多次攻門，但般奴費南迪斯、阿密特迪亞路等球員都把握唔到，加上63分鐘利辛度馬天尼斯食紅牌出場，導致未能收復失地，今仗有主場之利，應會有較佳發揮。尤其係「般費」早前公開批評主帥卡域克戰術，盛傳可能離隊，不過根據意大利傳媒爆料，沙特阿拉伯豪門希拉爾打算明年1月冬季轉會市場，再次提出收購呢位32歲葡萄牙國腳，但由於佢今季至今表現跌watt，只願意支付4,600萬鎊（約4.8億港元）轉會費，比1年前少超過一半！為咗保住身價，呢位曼聯隊長喺歐聯大舞台一定會畀足心機。

據悉曼聯未來2場比賽，將直接決定領隊卡域克能否留任，佢已別無選擇，相信會擺大個頭主攻。不過「紅魔鬼」防線始終太脆弱，若然壓前搶攻，難免暴露更多空位，令羅馬有機可乘。

羅馬火力猛唔會縮
另邊廂，羅馬今屆歐聯3戰1勝1和1負，「進攻大師」加斯柏連尼執教之下，大踢華麗足球，上場意甲作客以5比2大勝烏甸尼斯，並由5位球員射入，可見進攻多元化。前鋒唐耶爾馬倫今季12次上陣入11球，包括歐聯有3球進帳，勢必成為曼聯心腹大患。

羅馬今季意甲10戰入28球，創出球隊史上同期聯賽最多入波紀錄，必然會繼續利用進攻強項，向曼聯施壓，入波機會非常高。考慮到羅馬近3場合共失7球，後防亦唔穩陣，最好玩入球大。