[东方报]歐冠：衞冕王者 VS 戰無不勝 PSG巴塞巔峰大戰

歐聯重頭戲，兩支全勝球隊交鋒，巴黎聖日耳門（PSG）主場火併巴塞隆拿，雙方同樣以主攻風格聞名，擁有多位頂級射手助陣，並且皆處於巔峰狀態，今場預料會鬥到火花四濺。近兩屆歐聯冠軍PSG固然盡顯王者霸氣，西甲榜首巴塞戰績亦非常彪炳，今季各項賽事11戰全勝，近9場有7次總入球開5球或以上，4.5球入球大屬最佳選擇。（Now 638周三凌晨3時直播）

巴黎聖日耳門曾於季初表現失準，但始終根基深厚，迅速回勇取得6連勝，包括上輪歐聯作客以4比2擊敗英超全勝之師曼城，上半場已領先3球，鋒線球員傳射能力俱佳，奧士文尼迪比利繼上輪歐聯後，上場法甲又再次入波兼助攻，呢位法國國腳今季為PSG上陣9場入4球及6次助攻，效率極高。

迪比利倒戈特醒
奧士文尼迪比利曾經兩次倒戈鬥巴塞，都有取得入球，演出特別落力，加上迪斯亞杜伊、基華拉斯基利亞、費倫托利斯、域天拿等進攻球員亦具備出色射術，教練安歷基更加係「巴塞人」，非常熟悉對方踢法，相信可以作出針對性部署攻陷巴塞防線。

耶馬弗爆拉芬夏復出
另邊廂，巴塞隆拿今季走勢銳不可當，西甲及歐聯11戰全勝，合共轟入48球，換言之平均每場入超過4球，實在非常誇張。拉明耶馬踢出球王級水平，近9次為巴塞披甲入9球及9次助攻，上場聯賽對貝迪斯，亦射入1球世界波，PSG防線唔算穩陣，恐怕招架唔住耶馬來襲。另一位射手拉芬夏比洛尼已傷愈，今場有望復出，令球隊如虎添翼。不過，考慮到巴塞失波偏多，兩位後衞祖利斯古迪、艾利加西亞受傷缺陣，令防線雪上加霜，加上近4次歐聯對法甲球隊，只獲得1勝3負，包括兩次對PSG都敗陣，作客勝算唔高，玩入球大更佳。