[东方报]英超：鋒線銳利 防線回穩車仔 衝刺搶主W

英超今晚上演褪色「倫敦打吡」，由車路士主場迎戰熱刺。兩大豪門上季齊齊沉淪，無緣歐洲賽事，不過「車仔」今季喺沙比阿朗素執教後，實力得到提升、風格亦有明確方向，演出穩步上揚；相反熱刺表現依然掙扎，車路士開主勝機會高。（Now 621、622及611周日凌晨零時30分直播）

車路士季前銳意擴軍，陣容相當鼎盛，尤其進攻線非常銳利，祖奧柏度同摩根羅渣士合共已入9球。雖然開季演出「有前冇後」影響戰績，但隨住「沙比Sir」調整踢法，上場作客2比0擊敗愛華頓，拎到10個月來首次英超零失球，攻守演出更加平衡，向住正確方向進發。

熱刺上輪主場3比1擊敗高雲地利，終於打開今季聯賽勝利之門，不過整體表演唔算突出，占士麥迪臣、馬莫殊等遠射屬「神來之筆」，雖然入咗3球，但全場xG（預期入球）其實連1球都唔夠，可唔可以維持超水準進攻令人懷疑。睇番兩隊近6次喺聯賽交手，車路士全部贏晒，有格食格味道，捧主勝穩陣。

曼城發維大盤有計
同日另一場英超大戰，榜首曼城作客硬撼阿士東維拉。「藍月亮」今季聯賽7戰全勝勢如破竹，進攻球員個個狀態大勇，卓基、菲爾科頓、謝利美杜古個個都獨當一面，今場更有艾寧夏蘭特小休復出，入球有保證，近6場有5場開5球或以上。維拉近期亦愈戰愈勇，近3場主場轟11球，恃地利無懼同曼城駁火，3.5球入球大值博。（Viu 96、Now 621及611周六晚7時30分直播）