複製格連活特模式　基達菲想簽查頓辛祖

自由身球員查頓辛祖短期內有望落班，據報基達菲向該位26歲翼鋒開出報價，複製當年借用格連活特模式，幫助球員谷底反彈。

查頓辛祖今夏離開曼聯後一直冇班落，嚟到10月中都冇聲氣，「轉會專家」羅曼諾報道，基達菲已向查頓辛祖正式報價，相信正在商討。

基達菲曾於2023至24年球季向曼聯借用格連活特，當時格連活特已有一段長時間冇比賽，職業生涯陷入谷底，就係基達菲畀足機會佢重拾狀態，該球季上陣36場入10球，得以重生。

雖然查頓辛祖相繼被維拉同曼聯放棄，但佢份「CV」非常靚仔，連續3季跟隨多蒙特、車路士同維拉打入歐洲賽決賽，獲得2冠1亞，基達菲今季有得踢歐協聯，簽佢分分鐘有盃捧都未定。