卡域克被高層照肺：必須盡快提升成績

曼聯聯賽開季7戰得7分，英聯盃出局，歐聯2戰得3分，成績遠遜預期，據報領隊卡域克日前同高層開會，實際上係被「照肺」，總監韋確斯表態繼續支持卡Sir執教，不過前題係要盡快提升成績同改善表現。

英國傳媒報道，卡域克周一（19日）同韋確斯會面，會方稱曼聯董事局繼續支持卡Sir，不過係有條件支持，會方希望睇到成績提升，同時希望表現有放善，並對現時情況表示擔憂：同上季比較，現時曼聯表現平淡，而且容易被預判，同上季取得聯賽季軍判若兩隊。

曼聯董事局嘅立場係，唔想再重覆過去兩季做法，開季踢得差，幾個月就解僱主帥，不過亦唔會喺球隊愈踢愈差之下盲撐。

今次照肺後，董事局釋出明確信號，就係卡域克必須交出成績同改善球隊表現，否則就會考慮是否換帥。