兩位猛將受傷　利物浦「地獄賽程」有難

利物浦上場英超作客以2比1反勝賓福特，但付出沉重代價，中場蘇保斯拉爾、右後衞謝利美費林邦不幸受傷，預料會缺陣一段時間。紅軍人腳不整，加上將進入「地獄賽程」惡戰連場，爭標之路難行。

蘇保斯拉爾因為大腿受傷，已缺陣早前英超對曼城及上場歐聯對寧斯，今仗復出擔任正選，但踢咗32分鐘就因傷退下火線，至於謝利美費林邦下半場開波入替朗奴阿拿奧祖，點知僅過6分鐘就傷出。

賽後利物浦主帥伊拉奧拿表示，蘇保斯拉爾觸傷舊患：「兩人受傷情況唔同，蘇保斯拉爾可能仲未完全傷愈，導致舊患復發，謝利美費林邦屬於新傷，佢上場歐聯對寧斯，踢到抽筋，今次受傷同疲勞有關，佢哋將缺陣一段時間。」伊拉奧拿透露其他球員都出現疲態，仍然未百分百恢復狀態。

利物浦嚟緊要三線作戰，進入4場「地獄賽程」，將於周三(21日)凌晨歐聯主場對維拉利爾，跟住英超迎戰神勇嘅白禮頓，之後英聯盃對車路士，以及英超硬撼阿仙奴，非常考驗伊拉奧拿兵力部署。