拿玻里明夏可能出售麥湯米尼　維拉關注

蘇格蘭巨星麥湯米尼同拿玻里合約將於2028年夏天到期，據報雙方續約機會不大，拿玻里打算明年夏天將該前曼聯球星出售，標價在2,500萬至3,000萬歐元之間（約2.2億至2.64億港元），阿士東維拉密切關注。

意大利傳媒報道，麥湯米尼今年年底滿30歲，雙方正就續約進行談判，麥湯米尼代表目標年薪為800萬歐元，拿玻里未能承擔此開支，談判陷入膠着，如未能續約，拿玻里為防止財務損失，可能會將合約進入最後1年嘅麥湯米尼出售。

雖然麥湯米尼在《轉會市場》身價只有750萬歐元，但由於佢曾效力曼聯，擁有豐富英超經驗，對於英超球隊有一定吸引力。

阿士東維拉中場巴克里明年夏天約滿，麥湯米尼正好填補該空缺，而且佢同約翰麥甘尼喺蘇格蘭合作無間，兩人喺維拉合作，能力上有加乘。

不過麥湯米尼要求800萬歐元年薪，拿玻里嫌貴，維拉負擔起嚟都有壓力，不過如果維拉再有主力離隊，有強烈需要，到時再簽麥湯米尼就有理有據。